ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា បានកោតសរសើរដល់ប្រតិបត្តិការរបស់កងកម្លាំងបង្រ្កាបឧក្រិដ្ឋជនរំដោះទណ្ឌិតគ្រឿងញៀននៅខេត្តសៀមរាបបានជាបន្តបន្ទាប់ដោយជោគជ័យ។

រដ្ឋមន្ត្រីក្រសួងមហាផ្ទៃ ស សុខា បានសរសេរនៅក្នុងគណនីហ្វេសប៊ុកដូច្នេះថា៖ «ជោគជ័យនៅក្នុងបេសកកម្មដ៏មានសារៈសំខាន់មួយនេះ គឺកើតឡើងពីការខិតខំប្រឹងប្រែង និងរួមសហការគ្នាយ៉ាងល្អពីសំណាក់អាជ្ញាធរ ក៏ដូចជាកងកម្លាំងមានសមត្ថកិច្ចគ្រប់លំដាប់ថ្នាក់ ដោយមិនគិតពីពេលវេលា ការនឿយហត់ និងគ្រោះថ្នាក់ជាយថាហេតុ»។

ទន្ទឹមនឹងការកោតសរសើរ ឧបនាយករដ្ឋមន្ត្រី បានលើកទឹកដល់អាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់បន្តបេសកកម្មស្វែងរកចាប់ខ្លួនឧក្រិដ្ឋជនដែលនៅសេសសល់ និងឧក្រិដ្ឋជនក្នុងបទល្មើសផ្សេងៗទៀត មកផ្តន្ទាទោសទៅតាមផ្លូវច្បាប់ ដើម្បីរក្សាបាននូវសុខសុវត្ថិភាពជូនប្រជាពលរដ្ឋ និងសង្គមជាតិទាំងមូល ប្រកបដោយភាពសុខក្សាន្ត។

គូសបញ្ជាក់ថា គិតមកដល់ថ្ងៃទី២៤ ខែសីហា ឆ្នាំ២០២៣ កងកម្លាំងចាប់បានជនសង្ស័យដែលពាក់ព័ន្ធនឹងករណីប្លន់រំដោះទណ្ឌិតជនជាតិចិននៅខេត្តសៀមរាបឡើងដល់ ១៣នាក់ហើយ ក្រោយពីចាប់បានចំនួន ២នាក់បន្ថែមទៀតកាលពីថ្ងៃទី២៣ ខែសីហា ឆ្នាំ២០២៣៕